ଭୁବନେଶ୍ୱର: ଏଆଇ ଏବଂ ସୋସିଆଲ ମିଡ଼ିଆର ଅପପ୍ରଚାର ଯୁଗରେ ସାମ୍ବାଦିକତା ସାରା ବିଶ୍ୱରେ ଗୁରୁତର ବିପଦ ଦେଇ ଗତି କରୁଛି. ଏକବିଂଶ ଶତାବ୍ଦୀରେ ଆମକୁ ସାମ୍ବାଦିକତା ପେଶାର ମୌଳିକତା ଦିଗକୁ ଫେରିବାକୁ ପଡିବ. ସାମାଜିକ ଗଣମାଧ୍ୟମର କ୍ରମ ବର୍ଦ୍ଧିଷ୍ଣୁ ଭୂମିକା ଏବଂ ଯୋଗାଯୋଗ ପ୍ରକ୍ରିୟାରେ ଲୋକଙ୍କ ଅଂଶଗ୍ରହଣ ସହିତ ଏଆଇ ଇଣ୍ଟରନେଟରେ କୋଟି କୋଟି ସଂଖ୍ୟାରେ ଘଟଣାର ଅପପ୍ରଚାର ପ୍ରସାରିତ କରିବାକୁ ଅନୁମତି ଦେଉଥିବା ବେଳେ, ପାରମ୍ପରିକ ଗଣମାଧ୍ୟମର ଏକମାତ୍ର ଭୂମିକା ହେଉଛି ଜନସାଧାରଣଙ୍କ ପାଇଁ ବିଶ୍ୱସନୀୟ ଏବଂ ନିର୍ଭରଯୋଗ୍ୟ ସୂଚନାର ଉତ୍ସ. ବିଭିନ୍ନ ଉତ୍ସରୁ ଆସୁଥିବା ଖବର ବା ତଥ୍ୟ କୁ ଯାଞ୍ଚ କରିବା ଏବଂ ରିପୋର୍ଟିଂ ସମୟରେ ନିରପେକ୍ଷ ସ୍ଥିତି ଗ୍ରହଣ କରିବା ହେଉଛି ପେଶାଦାର ସାମ୍ବାଦିକଙ୍କ ପ୍ରଥମ କର୍ତ୍ତବ୍ୟ କର୍ତ୍ତବ୍ୟ. ଏହି ପରିପ୍ରେକ୍ଷୀରେ ଓଡିଶା ସାମ୍ବାଦିକ ସଙ୍ଘ, ଭୁବନେଶ୍ୱର, ଇଣ୍ଡିଆନ ଯର୍ଣ୍ଣାଲିଷ୍ଟ ୟୁନିୟନ ନୂଆଦିଲ୍ଲୀ ଏବଂ ଇଣ୍ଟରନେସନାଲ ରିଲେସନ ସେଣ୍ଟର, ପୋଲାଣ୍ଡର ମିଳିତ ସହଯୋଗରେ ଭୁବନେଶ୍ୱର ଆର୍ଯ୍ୟ ପ୍ୟାଲେସ ଠାରେ ଏକ ଅନ୍ତର୍ଜାତୀୟ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି. ଭୁଲ ତଥ୍ୟ ର ବହୁଳ ପ୍ରଚାର ପ୍ରସାର ଦିଗରେ ଭାରତର ପରିସ୍ଥିତି ୟୁରୋପଠାରୁ ଭିନ୍ନ ନୁହେଁ. ଉଭୟ ଦେଶ ଉପରେ ସ୍ୱେଚ୍ଛାଚାରୀ ଶାସନତନ୍ତ୍ରରେ ଜନମତକୁ ପରିଚାଳନା କରିବାକୁ ବିଦେଶୀ ହସ୍ତକ୍ଷେପ ଏବଂ ସୂଚନାର ପରିଚାଳନାରେ ନୂତନ ଘଟଣାମାନ ପ୍ରକାଶ ପାଉଥିବା ଦିଗରେ ଆଲୋଚନା କରାଯାଇଥିଲା.
ଇଣ୍ଟରନେସନାଲ ରିଲେସନ ସେଣ୍ଟରର ସଭାପତି ତଥା ୱାର୍ସ ବିଶ୍ୱବିଦ୍ୟାଳୟ, ପୋଲାଣ୍ଡ ର ପ୍ରଫେସର ଡକ୍ଟର ମାଲଗୋରଜାଟା ବୋନିକୋସ୍କି ମୁଖ୍ୟ ଅତିଥି ଭାବରେ ଯୋଗଦେଇ ପାରମ୍ପରିକ ଗଣମାଧ୍ୟମ ହେଉଛି ଅପପ୍ରଚାର ଏବଂ ଅଗଣତାନ୍ତ୍ରିକ ସମାଜ ବିରୁଦ୍ଧରେ ଲଢ଼ିବାର ଚାବିକାଠି ବୋଲି କହିଥିଲେ. ରାଜ୍ୟର ବିଭିନ୍ନ ପ୍ରମୁଖ ସାମ୍ବାଦିକ ଏହି ଆଲୋଚନାଚକ୍ରରେ ଅଂଶଗ୍ରହଣ କରି ଭାରତୀୟ ଗଣତନ୍ତ୍ର ଏବଂ ଗଣ ମାଧ୍ୟମ ନେଇ ସେମାନଙ୍କର ମତାମତ ପ୍ରଦାନ କରିଥିଲେ. ଓଡିଶା ସାମ୍ବାଦିକ ସଙ୍ଘର ସଭାପତି ଶଶି ଭୂଷଣ ପ୍ରହରାଜ ରାଜ୍ୟରେ ଗଣମାଧ୍ୟମ ଏବଂ ସାମ୍ବାଦିକ ମାନେ କିଭଳି ଭୁଲ ତଥ୍ୟ ଠାରୁ ଦୁରେଇ ପରୀକ୍ଷିତ ତଥା ପ୍ରକୃତ ତଥ୍ୟ ଲୋକଙ୍କ ନିକଟକୁ ପହଞ୍ଚାଇବେ ସେଥିପାଇଁ ସଂଘ ଏହି ଭଳି ଅନ୍ତର୍ଜାତୀୟ ସେମିନାର ଆୟୋଜନ କରିଥିବା କହିଥିଲେ. ଇଣ୍ଡିଆନ ଯର୍ଣ୍ଣାଲିଷ୍ଟ ୟୁନିୟନ ଏବଂ ଇଣ୍ଟରନେସନାଲ ଫେଡେରେସନ ଅଫ ଯର୍ଣ୍ଣାଲିଷ୍ଟର ଉପାଧ୍ୟକ୍ଷ ସବିନା ଇନ୍ଦ୍ରଜିତ ଅପପ୍ରଚାର ଏବଂ ଭୁଲ ସୂଚନା, ନକଲି ଖବର, ଭୁଲ ତଥ୍ୟ ବିଶ୍ୱସ୍ତରୀୟ ଘଟଣା ଏବଂ ନୈତିକ ସାମ୍ବାଦିକତା ସହିତ ଏହାର ମୁକାବିଲା କରାଯିବା ଉଚିତ ବୋଲି କହିଥିଲେ. ଏହି ଅବସର ରେ ଓଡ଼ିଶା ସାମ୍ବାଦିକ ସଂଘର ସ୍ମରଣିକା ଅତିଥି ମାନଙ୍କ ଦ୍ୱାରା ଉନ୍ମଚିତ ହୋଇଥିଲା. ସାମ୍ବାଦିକ ଶ୍ରୀକାନ୍ତ ରାଉତ ସେମିନାର ପରିଚାଳନା କରିଥିବା ବେଳେ, ଓଡିଶା ସାମ୍ବାଦିକ ସଙ୍ଘର ରାଜ୍ୟ ଉପସଭାପତି ଦୀପକ କୁମାର ନାୟକ, ରାଜ୍ୟ ସାଧାରଣ ସମ୍ପାଦକ ଦୁର୍ଯୋଧନ ମହାରଣା, ରାଜ୍ୟ ସମ୍ପାଦକ ରାଜକିଶୋର ତ୍ରିପାଠି, ଭୁବନେଶ୍ୱର ସଭାପତି ଅଶୋକ କୁମାର ସାହୁ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ.
